ઝાડની કેળવણી અને છંટણી દ્વારા ઘેરાવા અને આકારને શરૂઆતથી જ નિયંત્રિત રાખી ઝાડને ઈચ્છિત આકાર આપવાની રીતને કેનોપી મેનેજમેન્ટ કહે છે.
ઘનિષ્ટ વાવેતર પદ્ધતિમાં દરેક છોડનું થડ સીધું ટટ્ટાર રહે તે જરૂરી છે. માટે કલમને રોપ્યા બાદ છોડ લગભગ ૧.૦ મીટર ઊંચાઈનો થાય ત્યારે મુખ્ય ડાળીની ટોપ પરથી ગાંઠ (રીંગ બડ)ની નીચેથી કાપવું. જેથી કાપેલા ભાગની નીચેથી નવી ડાળીઓ ફૂટશે. જેમાંથી દરેક દિશામાં એક એક ડાળી મળે એ રીતે ત્રણથી ચાર ડાળીઓ રાખી બાકીની દૂર કરવી. આ જ ડાળીઓ આગળ જતા ઝાડની મુખ્ય ડાળીઓ બનશે. આ મુખ્ય ડાળીઓ લગભગ ૫૦-૬૦ સે.મી. લંબાઈની થાય ત્યારે ફરી વાર એ ડાળીને ટોચ પરથી ગાંઠની નીચેથી (રીંગ બડ) કાપવું. કાપેલા ભાગની નીચેથી જે નવી ડાળીઓ ફૂટશે તેમાંથી ત્રણ ડાળીઓ રાખી બાકીની ડાળી દૂર કરવી. આ રીતે એક મુખ્ય ડાળીમાંથી ત્રણ, ત્રણમાંથી નવ અને નવમાંથી સત્તાવીસ નવી ડાળીનું માળખું વિકસાવવાથી દરેક ઝાડને પૂરતા પ્રમાણમાં સૂર્યપ્રકાશ મળી રહે છે અને ઝાડનો આકાર છત્રી જેવો તૈયાર થશે. ઝાડની કેળવણી માટે રીંગ બડની નીચેથી કાપવું.
