સામાન્ય રીતે આપણે કપાસની વચ્ચે અન્ય પાકને આંતરપાક તરીકે લેવાનું કરતા હોઇએ છીએ ત્યારે ૬ ફૂટના પાટલે-બે છોડ વચ્ચેનું અંતર ૩ ફૂટનું રહે તે રીતે કપાસ અને વચ્ચે અન્ય પાકનો એક ચાસ એવું કરતા હોઇએ છીએ, ત્યારે એકરે ૨૪૨૦ છોડ કપાસના મળતા હોય છે. પણ કપાસની વચ્ચે બીજા કોઇ પાક લેવાને બદલે કપાસની વચ્ચે બસ – ”કપાસ” જ આ નવી પદ્ધત્તિ પ્રમાણે રોપી દઈએ અને દરેક ચાસમાં બે છોડ વચ્ચે દોઢ ફૂટનું અંતર રહે તે રીતે કપાસની ઘાટી રોપણી કરીએ તો જ્યાં એકરે ૨૪૨૦ છોડની સંખ્યા મળતી હતી તેની જગ્યાએ તેનાથી ચારગણી એટલે કે ૯૬૮૦ છોડવા મળી જાય ! આ માટે વહેલી પાકતી જાતનું બીજ પસંદ કરી, પોષણ-સંરક્ષણ-પિયતમાં પૂરતી ચીવટ લેવાય તો હુતાસણી સુધી ઊભા રાખેલ કપાસના પ્લોટમાં જે ઉત્પાદન મેળવી શકાય છે એનાથી વધુ ઉત્પાદન એકરદીઠ દિવાળી આવતાં સુધીમાં મેળવી શકાય છે, અને પાણીની સગવડ હોય તો એ જમીનમાં કોઇપણ રવિપાક લઈ લઈ શકાય છે ! અમે આ પદ્ધત્તિએ વાવેલ પ્લોટમાં નવેમ્બર આખરમાં કપાસને પૂર્ણ કરી ડીસેમ્બરની શરૂઆતે ઘઉંનો ઉત્તમ ઉતારો મેળવવાનો જાત અનુભવ લીધો છે. અને માનો કે હવે શિયાળે પિયતની સુવિધા નથી, તો ભલેને જમીન આરામ કરતી! જમીન “આરામ” કરે એમાંયે લાભ જ છે ને !
