આજે જ્યારે આખી દુનિયા ઘરોમાં છે અને અનેક બાબતો અટકી ગઈ છે, આવી સ્થિતિમાં કેટલાક લોકો ‘ભૂગોળ’ (અંતર સમજવું)ને ‘ઈતિહાસ’માં બદલીને વર્તમાન કપરા સંજોગોમાં નફો રળી રહ્યા છે. તેઓ એવી જગ્યાએ પહોંચી રહ્યા છે, જ્યાં જવાની તેમણે એ સમયે કલ્પના પણ કરી ન હતી, જ્યારે સામાન્ય દુનિયા તેજ ગતિએ ચાલતી હતી. તેમણે પોતાના ભૌતિક ઉત્પાદનોને દુકાનો પર ન વેચીને ટેક્નોલોજી અપનાવી છે. કેટલાક ઉદાહરણ જૂઓ

પ્રથમ સ્ટોરી: લગભગ એક વર્ષ પહેલા કાએરો ફૂડ્સે એ હૈદરાબાદમાં ડેરી ઉત્પાદન શરૂ કર્યું હતું, જેમાં આઈસક્રિમનો પણ સમાવેશ થાય છે. શહેરના કેટલાક ભાગમાં જ સેવાઓ ચાલુ કરી હતી અને સમયની સાથે આગળ વધવાની યોજના હતી. પ્રથમ લોકડાઉનના પ્રથમ સપ્તાહમાં જ તેણે ખુદને ‘ફાર્મ ટૂ હોમ’ (ખેતરથી ઘરે) સેવામાં બદલી નાખી. તેણે એક એપ બનાવી, જેના પર સર્વોચ્ચ ગુણવત્તાની શાકભાજી મુકી, સ્થાનિક ખેડૂતો પાસેથી ખરીદીની હૈદરાબાદ અને સિકંદરાબાદના દરેક ખૂણામાં સપ્લાય ચાલુ કરી દીધી. તેણે ઉપલબ્ધ લોજિસ્ટિક્સ શોધીને લોકડાઉનમાં સખત મહેનત કરી તેનો શ્રેષ્ઠ ઉપયોગ કરવાનો પ્રયાસ કર્યો. માત્ર શાકભાજી પુરતા જ મર્યાદિત ન રહેવાને બદલે એક મોટી બેકરી સાથે કરાર કરીને ત્યાંની સારી ગુણવત્તાવાળી બ્રેડની સપ્યાલ પણ શરૂ કરી. પછી એક નિકાસકાર પાસેથી ઈંડા લઈને એપ પર વેચવાનું શરૂ કર્યું. કુલ મળીને કંપનીએ ગ્રાહકોએ માગેલી દરેક વસ્તુઓ સપ્લાય કરી, કોઈ પણ વસ્તુ માટે ‘ના’ પાડી નહીં.

બીજી સ્ટોરી: જગદીશ સુનાગડના પિતાની કર્ણાટકના બીજાપુર પાસે 15 એકર જમીન છે. જગદીશ એમબીએ છે અને તેનાથી એ સહન થતું ન હતું કે લાખોની કિંમતની ડુંગળી, તરબુચ, કેળા અને રિંગણ બરબાદ થઈ જાય અને ખેડૂતો હતાશ થઈને વચેટિયાઓને વેચી દે. આજે બસાવના બાગેવાડી હોર્ટિકલ્ચર ફાર્મર પ્રોડ્યુસર કંપનીના સીઈઓ જગદીશ સમગ્ર દક્ષિણ વિસ્તારમાં માગ અને સપ્લાય પર નજર રાખે છે અને 22 ગામના 1000 ખેડૂતોના પાકનું મેનેજમેન્ટ કરે છે. તેઓ પોતે જ લોજિસ્ટિક્સ મેનેજર બનીને ખેડૂતોને શક્ય તમામ ફાયદો અપાવી રહ્યા છે.

સાભાર : દિવ્યભાસ્કર ( એન રઘુરામન)