મૂળ અને વનસ્પતિ ધર આંગણાના ફૂલ છોડ હોય/ સીમમાં હવા સાથે વાતો કરતા વૃક્ષો હોય કે ખેતરમાં લહેરાતો ઊભો મોલ હોય, આ બધી વનસ્પતિ મૂળ વગર જમીન પર ટકી શકે ખરી ? મૂળ વગરના છોડ કે વૃક્ષ તમે જોયા છે ? નથી જોયા,

ખરુ ને ? હકીકતમાં મૂળ તો જમીનમાં ફેલાય છે અને આપણે તો માત્ર છોડ કે વૃક્ષને જ જોવા પામીએ છીએ છતાં આપણે એમ કહીએ છીએ કે મૂળ વગર છોડનું અસ્તિત્વ ન હોય. જો કે આમાં પણ અપવાદ છે કેટલીક વનસ્પતિના મૂળ આપણે નજર સામે જોઈ શકીએ છીએ. હવાઈ મૂળ એટલે કે હવામાં લટકતા મૂળ. તમને યાદ આવી જશે ગામને ગોંદરે વર્ષોથી અડીખમ, અડગ ઊભેલો વડલો અને એ વડલાની વડવાઈ. આ વડવાઈ એ વડના હવાઈ મૂળ છે. એવી રીતે પાન કુટીના પાંદડા પર ફૂટેલા મૂળ આપણે જોઈ શકીએ છીએ. મકાઈ જેવા છોડને બહારથી ફૂટતા મૂળ મકાઈના છોડને અવલંબન પુરુ પાડે છે. જાણે તંબુ તાણવા માટે ચારે બાજુથી દોરડા ખેંચીને બાંધ્યા હોય. પાણીમાં ઉગતી વનસ્પતિના મૂળ પણ જોઈ શકાય છે. વનસ્પતિ સૃષ્ટિમાં આવા અપવાદરૂપ મૂળ પણ ઘણાં છે. બાકી સામાન્ય રીતે મૂળ જમીનમાં ઊડે ઉતરે છે અને ફેલાય છે