ખેતીકામ સમયસર કામ કેમ આટોપવા

ખેતીકામ માટે છૂટક મજૂરી ઉપર મજૂરો મળતા નથી, અને મળે તો મજૂરીના પ્રમાણમાં પૂરું કામ કરતા પણ નથી પણ જો એને ઉધડથી કામ સોંપ્યું હોય તો તે ઝપાટાબંધ કરી વાળે છે.એટલે દા.ત. કપાસ વીણવા રોજમદારી પર કામે લાવવાને બદલે એક મણ કપાસ વિણી આપવાના દા .ત . 2૦૦ રૂપિયા મળશે. એવું નક્કી કરશું તો એ તૂટાતૂટ કામ કરશે, અને આપણું કામ થઇ જશે. આજે મજૂરોથી થતા કેટલાક કામો અધતન ખેતસાધનોથી કરવાનું નક્કી કરીએ. જેમ કે ઘઉ વાઢી-ભારોટા ભરી-ખળામાં મસળી-વાવલી-ચારણેચાળી-ધાર કરી-ઢગલો કરવામાં જોઈતા કેટલાય મજૂરનું કામ હાર્વેસ્ટરને ભળાવતા થોડા કલાકોમાં સમેટી આપે છે. એવું જ બીજની વાવણી વખતે નીચે પાયાનું ખાતર, ઉપર બીજની વાવણી,અને ક્યારા-પાળીનાં બંધારમાં જોયતા ઘણા મજૂરનું કામ ઓટોમેટિક વાવણીયો કરી આપે છે. જુવાર-બાજરી વાઢવા રીપર, ઉભીસાઠી કે દિવેલાને ખેંચવાને બદલે ઉભે ઉભાના કુવળ જેવડા કકડા કરી પડામાં જ પાથરી દેનાર શ્રેડર, કે દવા છંટકાવ માટે “ડ્રોન” નો ઉપયોગ કરીએ તો કામ ઝડપથી થાય અને સસ્તું પડે એ નફામાં. રોગ-કિટકનાં હુમલા વખતે ઝેર છંટકાવનું કામ નવીનતમ ટેકનોલોજીનાં સાધન “ડ્રોન” ને સોંપીએ પહેલેથી જ આપણી ખેતી “મજૂરીભાગે” -૨૫-૩૦ કે ૩૩ ટકા – એકબીજાને જે રીતે પોસાણ થાય તે રીતે ઉધડથી આપી દઈએ તો તે લોકો કામ ચીવટથી કરે અને આપણને છૂટક મજૂરી કરતા સસ્તું પણ પડતું હોય છે.