પ્રાકૃતિક ખેતી, ગાય આધારિત ખેતી , સજીવ ખેતી , ઓર્ગનિક ખેતી આ બધી ખેતી કરવી હોય તો તેના માટે મહત્વની વાતો કઈ છે? પહેલી વાત કે આજકાલ લોકોને ઓર્ગનિક ખાવું છે એટલે જો તમે આવી ખેતી કરવા ધારો તો સૌ પ્રથમ તમારી થોડી જમીનમાં આ પ્રયોગ કરો. તમારામાં એકાદ બે વર્ષ ઓછા ઉત્પાદન ખમવાની તૈયારી હોવી જોઈએ. આ ખેતીમાં ઝેર મુક્ત અથવા તો રેસીડ્યુઅલ ફ્રી પેદાશ પેદા થતી હોવાથી જો તે પેદાશના વધુ ભાવ મળે તોજ ઓછી પ્રોડક્ટિવિટી – ઉત્પાદકતા સામે આપણી આવક જળવાય નહીંતર ગધુ ને ફાળિયું બધું જાય તે કહેવત સાચી પડે ?, આ માટે સોસીયલ મીડિયા પ્લેટફોર્મનો ઉપયોગ કરીને તમારી પેદાશનું મૂલ્ય વર્ધન અને માર્કેટિંગ તમે કરી શકો તોજ આ ખેતી કરાય એવું જાણકારોનું કહેવું છે ? બીજું કે તમારી પાસે સેન્દ્રીય તત્વોનું ઉમેરણ કરવા માટે પશુ ધન હોવું જોઈએ , ઓછા નામે તમારી પાસે ગાય હોવી જોઈએ કારણ તમારે તમારી જમીનને લબાલબ સેન્દ્રીય તત્વોથી ભરીને જમીનનો કાર્બન અને જમીનના સૂક્ષ્મ જીવોની ભરપૂર કરીને જમીનને જીવતી કરવી પડશે. જરૂર પડે તો કુદરતની ભેટ જેવા બાયો ફર્ટિલાઇઝર અને બાયો ફંજીસાઇડ વાપરીને જમીનને પોચી, ભરભરી અને કાર્બન રિચ બનાવવી પડે મારા ભાઈ !
